hor.de | Gedichtsammlung | Wörterlisten | Notizen
D Zeit
Dia Zeituhr goht so still und gstät,
Du hairscht koi' Rädle goura,
Doch aih du dra' denkscht, hot se s dreht,
Du merkscht as mit Bidoura,
Daß s Jährle frei verlaura'n ischt
Und du deim End vill näher bischt.
Zwor wenn a'n Aunglück uff der reitt,
Muascht freile Lankweil kriaga;
Doch hoscht halbweags a guati Zeit,
Noch saischt, ma' seah sie fliaga,
Und jomarascht, daß so a Ma',
Wia du, dia Zeit it binda ka'.
Du eilscht und schaffscht, und wenns der will,
Wead ghousat, vill verworba,
Uff oi' mol stoht do s Rädle still
Und s hoißt: "der Ding ischt gstorba",
Dei' Housa, Bruadar, hot a'n End,
Dei' Zuig, des kommt in andre Händ.
Ma' lobt und schilt a Weile noh -
S wead gmoingli redli gmeassa -,
Noch kommt no diar der So und So,
Und du - bischt rei' vergeassa.
A Fremder lait dein Kittel a',
Schreibt uff dei' Tür sein Nama na'.