Heinrich von Morungen

XXIII.   Ich hôrte ûf der heide

I

Ich hôrte ûf der heide
lûte stimme und süezen sanc.
dâ von wart ich beide
vröiden rîch und an trûren kranc.
Nâch der mîn gedanc sêre ranc unde swanc,
die vant ich ze tanze, dâ si sanc.
âne leide ich dô spranc.
 

II

Ich vant sî verborgen
eine und ir wengel von trehen naz,
dâ si an dem morgen
mînes tôdes sich vermaz.
Der vil lieben haz tuot mir baz danne daz,
dô ich vor ir kniewete, dâ si saz
und ir sorgen gar vergaz.
 

III

Ich vant si an der zinne
eine, und ich was zuo zir gesant.
dâ mehte ichs ir minne
wol mit vuoge hân gepfant.
Dô wânde ich diu lant hân verbrant sâ zehant,
wan daz mich ir süezen minne bant
an den sinnen hât erblant.