Anonym

Merseburger Zaubersprüche

I.

Eiris sâzun idisi, sâzun hêra duoder.
Suma hapt heptidum, suma heri lezidun,
suma clûbôdun umbi cuoniouuidi:
insprinc haptbandum, inuar uîgandun!
 

II.

Dû uuart demo Balderes uolon sîn uuoz birenkit.
Thû biguol en Sinthgunt, Sunna era suister,
thû biguol en Frîia, Uolla era suister;
thû biguol en Uuôdan sô hê uuola conda:
sôse bênrenkî, sôse blutrenkî,

sôse lidirenkî:

bên zi bêna, bluot zi bluoda,
lid zi geliden, sôse gelimida sin!