hor.de   |   Gedichtsammlung   |   Wörterlisten   |   Notizen
 

Heinrich von Morungen

XXVII.   Si hât mich verwunt

I

Si hât mich verwunt
rehte aldurch mîn sêle
in den vil toetlîchen grunt,
dô ich ir tet kunt,
daz ich tobte unde quêle
umb ir vil güetlîchen munt.
Den bat ich zeiner stunt,
daz er mich ze dienste ir bevêle
und daz er mir stêle
von ir ein senftez küssen, sô waer ich iemer gesunt.
 

II

Wie wirde ich gehaz
ir vil rôsevarwen munde,
des ich noch niender vergaz!
doch sô müet mich daz,
daz si mir zeiner stunde
sô mit gewalt vor gesaz.
Des bin ich worden laz,
alsô daz ich vil schiere wol gesunde
in der helle grunde
verbrunne, ê ich ir iemer diende, in wisse umbe waz.